Taça da Liga, F.C Porto Taibessi iha Preparasaun Másimu Hakarak Hakat Ba Meia-Finál

Ekipa jogadór F.C Porto Taibessi selebra vitória hafoin manán nia adversáriu Lica-Lica Lemorai F.C ho skor 3-0 iha jogu Taça da Liga iha Estádiu Munisipál, Díli, Domingu (01/02/2026). Imajen/Rafa.tl

DILI, RAFA.tl– F.C Porto Taibessi otimista ho preparasaun ne’ebé másimu, garante manán adversáriu Fitun Estudante Lorosa’e F.C iha jogu ikus group C Taça da Liga hodi hakat ba faze meia-finál.

Notísia Relevante: F.C Porto Taibessi Lidera Tabela Klasifikasaun Grupu C Hafoin Manán Lica-Lica Lemorai F.C ho Skor 3-0

Treinadór F.C Porto Taibessi, Luís Simões afirma, nia ekipa iha ambisaun hakarak manán adversáriu iha jogu ikus kontra Fitun Estudante Lorosa’e F.C hodi hetan tiketi ba faze meia-finá Taça da Liga époka ne’e,  tanba F.C Porto Taibessi durante ne’e  hala’o ona preparasaun  ne’ebé másimu.

“Se hakarak ita avansa tenke manán. Ami konfia ba jogadór sira ne’ebé mak sei tun primeiru, no hakarak avansa ba oin, ami tenke manán,” Luis Simões hateten iha konferénsia imprensa, Kuarta (04/02/2026), iha Estádiu Munisipál Díli.

Kapitaun ekipa F.C Porto Taibessi, Cláudio Fermino Soares Araújo hatete, nia ekipa sei hatudu jogu ne’ebé ho tátika di’ak no furak ba adeptus sira tuir orientasaun ne’ebé treinadór sira fó durante halo treinamentu.

“Ami nia preparasaun ne’e di’ak, ha’u sei lidera ha’u nia klubu,  tuir buat ne’ebé mak ami nia  treinadór implementa bainhira ami treinu. Iha ekipa hotu,  iha nia kapitaun sempre fuan boot, hodi nia ekipa ba to’o meia-finál,” Cláudio Fermino Soares Araújo hateten.

Treinadór Fitun Estudante Lorosa’e F.C, Hermelo José Pereira afirma, maske nia ekipa la hetan ona oportunidade hodi ultrapasa ba faze tuir mai, maibé nafatin prepara ekipa hodi kompete.

Nia afirma, Fitun Estudante Lorosa’e laiha ona oportunidade atu ultrapasa, maibé ko’alia kona-bá preparasaun nu’udar Treinadór, sei nafatin prepara jogadór sira, no prepara nafatin ekipa mai joga iha Sesta agora.

“Ita hotu  hatene katak, Porto ekipa ne’ebé zigante iha primeira divizaun, nia mós iha oportunidade atu ultrapasa ba meia-finál, maibé ha’u hakarak hatete ba ita-boot sira katak, jogu ne’ebé sei akontese iha Sesta, 06 fulan-Fevereiru ne’e,  ami prontu atu compete no garante atu manán Porto Taibessi,” Hermelo José Pereira harteten.

Tuir oráriu, jogu entre F.C Porto Taibessi ho Fitun Estudante Lorosa’e F.C  sei hala’o jogu ikus iha grupu C Taça da Liga FFTL iha Sesta, 06 Fulan-Fevereiru, iha Estádiu Munisipál Díli, iha tuku 18:00 Otl.

Reportajen ekipa Rafa.tl