Jogu Ikus Faze Grupu C Taça da Liga, Coração F.C Preparadu Manán Adversáriu Lica-Lica Lemorai F.C

Treinadór Coração FC, Gaspar Amaral akompaña husi kapitaun ekipa Coração FC, Miguel Arcanjo Ximenes "Bojan" halo konferénsia imprensa iha Estádiu Munisipál Díli, Kuarta (04/02/2026). Imajen/Rafa.tl

DILI, RAFA.tl- Ekipa Coração F.C iha preparasaun másimu, liu-liu iha tátika no tékniku sira, hodi manán adversáriu Lica-Lica Lemorai F.C  iha jogu ikus faze grupu C Taça da Liga FFTL.

Notísia Relevante: Coração F.C Rekolla Pontu Tolu Hafoin Halakon Fitun Estudante Lorosa’e F.C ho Skor 2-1

Treinadór ekipa Coração F.C,  Gaspar Amaral hatete, nia ekipa preparadu no hakarak halakon adversáriu ho golu haat ba leten, atu nune’e, bele pasa ba faze meia-finál.

“Ho pontus ne’ebé mak hanesan entre ami ho F.C PortoTaibessi, sira liu ami ho bola, ne’e ezije ami atu luta maka’as hodi hetan, la’os vitória de’it, maibé ho golu ne’ebé mak barak, atu ne’e bele pasa ba faze tuir mai. Ida-ne’e mak ami nia espetativa atu hasoru ami nia adversáriu Lica-Lica F.C, ami garante hakarak halakon ho golu barak,” Gaspar Amaral haktuir ba jornalista sira liu husi konferénsia ba imprensa iha Estádiu Munisipál Díli, Kuarta (04/02/2026).

Kapitaun Coração F.C, Miguel Arcanjo Ximenes ”Bojan” ne’ebé hanesan mós top skor provizóriu iha Taça da Liga ne’e afirma, nia parte sei esforsu maka’as liután hamutuk ho ekipa atu bele rekolla pontu tolu, inklui bele hetan  oportunidade hodi hatama tan golu.

“Hanesan kapitaun ba ekipa, ha’u sei servisu ho ekipa tanba servisu ekipa importante liu, kona-bá golu, ha’u mós hakarak hatama golu, maibé ita haré mós ba servisu ekipa lai, nune’e servisu ekipa di’ak ita bele fásil hatama golu,” Miguel Arcanjo Ximenes ”Bojan” hateten.

Iha fatin hanesan,  treinadór ekipa Lica-Lica Lemorai  F.C, Nelson Soares  afirma, nia ekipa mós preparadu hodi hala’o jogu kontra Coraҫão F.C.

“Ami nia preparasaun másimu hela hodi hasoru Coracao FC, atu manán ka lakon mós, ami labele dehan atu manán, tanba ita haré  klubu primeira divizaun nia ritmu jogu la hanesan ho segunda divizaun, ne’ebé ami prepara de’it, atu lakon ka manán mós, 90 minutus mak determina,” Nelson Soares hateten.

Tuir oráriu jogu entre Coração F.C no Lica-Lica Lemorai F.C sei hala’o iha Sábadu, 07 fulan-Fevereiru ne’e iha Estádiu Munisipál Díli.

Reportajen ekipa Rafa.tl