Taça da Liga, Assalam F.C Halakon Nia Adversáriu Nagardjo F.C ho Skor 1-0

Ekipa Assalam F.C iha Taça da Liga 2025. Imajen/Rafa.tl

DILI, RAFA.tl – Assalam F.C halakon nia adversáriu Nagardjo F.C ho skor 1-0 no ho vitóri ida ne’e loke dalan ba Assalam F.C hodi lidera grupu B Taça da Liga 2025 ho pontu-neen no hakat ba faze meia-finál.

Notísia Relevante: Assalam F.C Rekolla Pontu Tolu no Lidera Tabela Klasifikasaun Grupu B Hafoin Manán DIT F.C 2-1

Jogu ne’ebé hala’o iha Estádiu Munisipál Díli, Sábadu (31/01/2026), ekipa rua ho ambisaun ne’ebé hanesan hakarak rekolla vitória iha jogu ikus Taça da Liga FFTL iha grupu B hodi bele hakat ba faze tuir mai.

Iha jogu primeira parte ekipa Assalam F.C no Nagardjo F.C hatudu jogu ida atrativu no anima tebes adeptu sira ne’ebé fó apóiu ba sira iha kampu Estádiu Munisipál Díli.

Ekipa Nagardjo F.C halo uluk ameasa ba guarda rede Assalam F.C, maibé bola ne’ebé ezekuta husi jogadór Nagardjo F.C kona de’it baliza nia riin no falla tama ba rede laran hodi halo golu.

Ekipa rua kontinua halo jogu ho tátika no tékniku ne’ebé iha, no Assalam F.C ne’ebé ho kalma hahú hadi’a jogu husi liña klaran no halo kontra atake ba Nagardjo F.C hodi buka oportunidade atu hatama golu, maibé adversáriu mantein kalma no asegura pozisaun ne’ebé iha. To’o primeira parte termina ekipa rua mantein ho skor 0-0.

Tama ba segunda parte, treinadór ekipa rua hahú halo estratéjia foun hodi halo mudansa ba jogadór sira no buka meius atu hatama golu hodi lidera jogu ne’e.  Ekipa rua halo jogu ida nakloke no ekipa rua iha oportunidade hanesan ba hatama golu.

Tama ba minutu 60 Assalam F.C liu husi jogadór Agosto da Costa, marka golu ida ba nia ekipa hodi muda skor ba 1-0.

Hafoin golu ne’e ekipa rua hasa’e liután ritmu jogu no halo situasaun iha kampu laran manas uitoan.

Nagardjo F.C hahú halo mudansa ba estratejia no buka meius atu halo impata ba jogu ne’e hodi hadau oportunidade ba lidera tabela klasifikasaun, maibé mantein falla no Assalam F.C iha superioridade liu hodi lidera jogu ne’e.

To’o segunda parte jogu termina, Assalam F.C kontinua lidera ho skor 1-0 no ho rezultadu ne’e halo Assalam F.C lidera grupu B Taça da Liga no Nagardjo F.C falla hakat ba faze tuir mai tanba kolekta deit pontus tolu husi jogu rua.

Treinadór Nagardjo F.C, Eduardo Perreira hateten iha primeiru parte nia ekipa sei halo jogu ida kapas no iha balansu ba jogu, no Nagarjdo F.C halo atake di’ak, mas nia rekoñes, falla iha ezekusaun.

Iha segunda parte halo mudansa ba jogadór sira, maibé tuir Eduardo Perreira, iha kampu hatudu rezultadu seluk hafoin jogadór defeza Nagardjo F.C rasik komete erru iha lina kotuk.

“Maske Nagardjo elemina ona, maibé ba oin iha tinan ida ne’e sei ihal iga, prepara halo di’ak no espera katak Prezidente FFTL, Nilton Telmo Gusmão dos Santos, kontinua sai hanesan motivador futeból hodi konkretiza Futeból Timor-Leste sia orgullu nasionál,” Eduardo Pereira hateten.

Iha fatin hanesan, treinadór Assalam F.C, Adu Marques Nami Ruru hateten, antes ne’e otimista sei manán Nagarjdo F.C tanba hafoin jogu primeiru ekipa Assalam F.C iha tempu sufisiente para halo preparasaun hodi enfrenta jogu ne’e.

“Ha’u fiar ha’u nia jogadór sira, ha’u garante ha’u nia tátika ho esperansa katak manán hodi rekolla pontu-tolu. Assalam F.C iha preparasaun másimu ba jogu tuir mai,” Adu Marques Nami Ruru hateten.

Reportajen ekipa Rafa.tl