Coração F.C iha Ambisaun Manán, F.C Portu Taibessi Garante Asegura Pontu Tolu

Coração F.C halo preparasaun ba joga kontra F.C Porto Taibessi iha Taça da Liga 2025. Imajen/Rafa.tl

DILI, RAFA.tl – Coração F.C iha ambisaun hakarak manán F.C Portu Taibessi iha jogu dahuluk, maibé ekipa estimadu komunidade Taibessi ne’e garante asegura pontu tolu iha jogu dahuluk hodi loke dalan ba faze tuir mai iha Taça da Liga 2025.

Notísia Relevante: Assalam F.C Rekolla Pontu Tolu no Lidera Tabela Klasifikasaun Grupu B Hafoin Manán DIT F.C 2-1

Tuir oráriu, Coração F.C no F.C Porto Taibessi sei hala’o sira nia jogu dahuluk ba Taça da Liga 2025 iha grupu C ne’ebé sei hala’o iha Estádiu Munisipál Díli, Sesta semana ne’e, nune’e treinadór husi ekipa rua ne’e ida-idak  iha ambisaun atu rekolla vitória iha jogu ne’e hodi hetan pontu tolu no asegura pozisaun iha tabela klasifikasaun hodi hakat ba faze tuir mai.

Treinadór Coração F.C, Gaspar Amaral ba Rafa.tl iha Kampu Bintang, Bidau, Tersa (20/01/2026) hatete, nia parte prepara ona estratéjia liu husi tékniku no tátika ne’ebé sei implementa iha jogu,  no iha esperansa katak jogadór sira bele hatudu jogu ne’ebé di’ak hodi bele rekolla pontus tolu.

Nia rekoñese Coração F.C nia preparasaun seidauk másimu, tanba foin mak halo preparasaun intensivu iha semana ida ho balun ba semana rua, tanba ne’e sei tenta ho másimu possível para hatudu jogu ne’ebé furak tuir tékniku espesiál ne’ebé jogadór sira iha.

“Tanba jogadór sira mós mai ho esperiénsia ne’ebé di’ak de’it, entaun ami orsida haré tuir depois mak ami halo atu joga oinsá. Ami otimista hakarak halakon Porto Taibessi, maibé ida ne’e depende, orsida ita haré tok, tanba iha jogu bele akontese kualker buat ne’ebé ita la espera, maibé ami sempre ho otimista ida katak, ami hakarak rekolla trés pontus iha primeiru jogu ne’ebé mak importante tebes,” Gaspar Amaral hateten.

Kapitaun ekipa Coração F.C, Miguel Arcanjo Ximenes “Bojan” hatete, otimista nia ekipa sei manán iha jogu kontra F.C Porto Taibessi, tanba durante ne’e ekipa halo ona preparasaun ho másimu tebes.

“Nu’udar kapitaun ekipa, sempre iha optimista hodi servisu hamutuk ho ha’u nia maluk sira iha ekipa, atu nune’e bele manán iha Sexta ne’e. Ami iha buat balu ne’ebé mak treinadór hanorin ona ami, ami mos sei aplika buat ne’ebé ami hetan ona husi treinadór ba iha jogu Sexta ne’e”. Hatete Miguel Arcanjo Ximenes “Bojan”.

Iha sorin seluk treinadór F.C Porto Taibessi, Henki Noguera afirma, nia ekipa halo ona preparasaun másimu hodi joga kontra nia adversáriu, no garante asegura pontu tolu iha jogu dahuluk ne’e.

“Ami nia preparasaun durante semana rua ho balun, ami sente  másimu hodi hasoru Coração F.C, ami  iha preparasaun tékniku no mos kolega estranjeiru balu husi atambua mai ajuda tan. Iha tinan kotuk ami joga hasoru Coração FC, ami manán um a zero, tinan ida ne’e ami hakarak joga halo di’ak liu-tan. Hanesan treinadór, ha’u ho ha’u nia ekipa hakarak manán, maibé minutu 90 mak determina,” Henki Noguera afirma.

Kapitaun ekipa F.C Porto Taibessi, Claudio Firmino Soares Araújo hatete, nu’udar kapitaun sei orienta nia ekipa tuir instrusaun ne’ebé treinadór fó durante iha treinu, atu nune’e bele joga ho di’ak tuir vizaun ne’ebé iha hodi rekolla vitória.

“Ha’u fiar katak ho ami nia hamutuk,  ami sei rona saida mak ami hetan ona husi treinadór, ami fiar katak sei avansa ho jogu ida semana tuir mai”. Hatete Claudio Firmino Soares Araujo.

Iha jogu Taça da Liga, Coração F.C la halo kontratu ho jogadór estranjeiru ruma, nune’e ekipa estimadu komunidade Meti-Aut ne’e sei reforsa de’it husi jogadór nasionál ne’ebé iha no F.C Porto Taibessi sei reforsa husi jogadór estranjeiru na’in-haat husi Atambua-Indonézia.

Reportajen ekipa Rafa.tl