Ba Oin, Laiha Fatin Ba Jogu Ilísitu iha Timor-Leste

Ministru Justisa Sérgio de Jesus Fernandes da Costa Hornai. Imajen/Rafa.tl

DILI, RAFA.tl– Ministru Justisa (MJ), Sérgio de Jesus Fernandes da Costa Hornai, deklara ba oin  laiha fatin ba jogu ilísitu iha Timor-Leste no órgaun polisiál kriminál sira hanesan Polísia Sientifíka Investigasaun Kriminál (PCIC, sigla portugés) kontinua hakle’an investigasaun ba kazu jogu online scamming iha Otél Oe-Upu, Rejiaun Administrativu Espesiál Oé-Cusse Ambeno (RAEOA).

Notísia Relevante: Governu Deside Kansela Lisensa Ne’ebé Fó Ba Operasaun Jogu Online iha Timor-Leste

Ministru Justisa Sérgio de Jesus Fernandes da Costa Hornai, ba jornalista sira iha Palásiu Governu Díli, Kuarta (01/10/2025), hateten Governu halo ona aprovasaun ba rezolusaun Governu hodi bandu no dada hikas lisensa ba jogu online sira, tanba ne’e, ba oin kona-bá lisensa ba jogu online sira ne’e kompeténsia Governu nian liu husi Inspesaun Jerál Jogu (IGJ), maibé Ministériu Justisa nia papel liu husi autoridade polisiál sira mak asegura la bele iha tan jogu ilísita iha Timor-Leste.

“Ba oin  sei la fó fatin ba  jogu online illegal sira atu loke sira nia atividade iha Timor Leste” Ministru Sérgio de Jesus Fernandes da Costa Hornai afirma.

Nia hatutan kona-bá kazu jogu online scamming iha Otél Oe-Upu RAEOA, parte PCIC sei kontinua halo investigasaun, bainhira finaliza ona sei intrega ba Ministériu Públiku.

Governante ne’e haktuir kona-bá prosesu investigasaun ba jogu online sira ne’e lao hela  no husu atu fó tempu ba PCIC hodi  halo nia servisu.

Iha Kuarta (01/10/2025), Governu liuhosi reuniaun Konsellu Ministru aprova ona projetu Rezolusaun Governu, ne’ebé aprezenta hosi Ministru Prezidénsia Konsellu Ministrus, Hermenegildo Pereira, ne’ebé determina kanselamentu lisensas ne’ebé fó ba operasaun jogu no aposta online.

Rezolusaun Governu ida-ne’e mós determina kanselamentu prosedimentu lisensiamentu sira ne’ebé la’o hela no bandu lisensa foun sira ba tipu atividade ida-ne’e, haree ba risku sira ne’ebé identifika ona ba nasaun nia seguransa, estabilidade sosiál, integridade ekonómika no reputasaun internasionál. Ministériu tutela, hamutuk ho forsa seguransa sira, sei tau matan ba implementasaun medida sira ne’ebé aprova ona hosi Rezolusaun Governu ida-ne’e.

Diploma ne’e mós estabelese revizaun ba lejizlasaun aplikavel, liuliu Dekretu-Lei n. 6/2016, loron 20 fulan-abríl, ne’ebé regula setór ne’e.

Antes ne’e, Governu Timor-Leste liu hosi Inspesaun Jerál bá Jogu (IG), sigla portugés) fó ona lisensa hodi lejitima jogu online hitu (7) no dadaun iha haat mak halo ona atividade iha Dili laran.

Jogu online haat (4) ne’ebé eziste no halo nia operasaun iha Dili laran mak hanesan; ARL Kapstaad Unip, Lda, lokaliza iha Delta besik ponte foun, no nia filiál ida iha Bebonuk. ARL Kapstaad Unip, Lda hetan lisesna durante tinan 15 (sanulu resin lima).

Jogu online ne’ebé opera husi empreza Frandes Doutel Unip, Lda lokaliza iha area Kulu-hun de Baixu, hetan lisensa tinan-rua dadaun estende tan lisensa ba tinan ida.

Amizade Sentru Online, Lda,  lokaliza iha besik Sede Suku Bemori no nia filiál rua; ida iha Fatuhada no ida seluk iha área Metiaut.

Empreza MJX Monjuxacar Lda, nia atividade jogu online lokaliza iha Timor Plaza CBD4 nia filiál ida iha Delta.

Molok ne’e IGJ mós fó ona lisensa ba atividade jogu Lotaria sira, mak hanesan Amizade Lda, Timor Pools, Lda, Rudal, BedFord Lda, Dream Entertaiment, Toto Fitun Timor ho Restar Global Timor.

IGJ mós fó lisensa ba atividade jogu Toto Bola sira mak hanesan, Sucesso Hamutuk Lda, Funspotaaa Ball Lda, BringsQ 04 Lda, Narabey Lda.

Iha mós lisensa ba jogu Slot Machine mak hanesan, Timor Holding GoldenSans, MTG Holding ho Hunlon Julma Lda.

Reportajen ekipa RAFA