Governu Análize no iha Hela Tetu Orsamentu Bá Konstrusaun Estádiu Unidade Nasionál iha Tasi-Tolu

Ministru Juventude, Desportu, Arte no Kultura (MJDAK), Nelio Isaac Sarmento. Imajen/Rafa.tl

DILI, RAFA.tl – Ministru Juventude Desportu, Arte no Kultura (MJDAK), Nelio Isaac Sarmento, informa Governu seidauk iha desizaun bá konstrusaun Estádiu Unidade Nasionál iha Tasi-Tolu, inklui reabilitasaun Estádiu Munisipál Dili, tanba sei análize no iha hela tetu orsamentu, inklui haree mós bá propetáriu rai ne’ebé atu halo konstrusaun bá.

Notísia Reelvante: FFTL La Kontente MJDAK La Hatudu Vontade Di’ak Deskute Reabilitasaun Estádiu Munisipál Dili

Ministru Juventude, Desportu, Arte no Kultura (MJDAK), Nelio Isaac Sarmento, bá jornalista sira iha Palásiu Governu, Segunda (08/09/2025),  hateten konsidera prosesu sira bá konstrusaun Estádiu Unidade Nasionál no reabilitasaun Estádiu Munisipál Dili, inklui konstrusaun bá kampu Futsál Indoor ne’e,  la’ós polémika maibé negósiasaun ho FFTL sei iha prosesu nia laran, tanba ko’alia  kona-bá konstrusaun ne’e, ministériu hothotu iha hotu laran, hanesan Ministériu Planeamentu Investimentu Estratéjiku, Ministériu Justisa, tanba prioridade  iha hotu laran, servisu hamutuk hodi   avansa dala ida de’it ho, kampu futsál Indoor tuir padraun internasionál  iha área Tasi-Tolu.

“Dadaun ne’e husi parte Governu sei iha faze diskusaun, bainhira ami nian hotu ona, maka  ami ko’alia negosiasaun ho Federasaun Futeból Timor-Leste (FFTL), agora ne’e seidauk,  ami seidauk iha tempu hodi  tuur  hamutuk tanba sei  iha prosesu, ne’e seidauk hotu,” Nelio Isaac Sarmento esplika.

Nia hatutan Governu nia Pozisaun maka ho ideia sira ne’ebé mai husi  Federasaun Futeból Timor-Leste, maka oinsá atu tuur haree didi’ak hodi  enkuadramentu Legál sira ne’e, oinsá  tuur  hamutuk haree lei sira ne’e, atu nune’e aban bairua  la bele prejudika fali, tanba MJDAK tenke garantia kontinuidade, katak  sé aban bairua   IX Governu sai tiha, Governu ida mai troka halo, atu halo saída,  tanba ne’e  tenke  hatuur didi’ak prosesu ne’e, atu nune’e,  labele prejudika  iha futuru.

“Agora ho hanoin ida FFTL ne’e, ita mós buka hela,  mais ou menus atu harii Estádiu Olémpiku ne’e,  rai iha ne’ebé, fatin iha ne’ebé, ne’e mós ita tenke estuda hotu, nune’e mós ita halo estadu mós kona-bá  orsamentu  ne’ebé atu uza,  harii Estádiu  de’it, poll iha ne’ebá ne’e nia kustu hira, ita tenke tetu  ho didi’ak  para ita halo investimentu  tenke estratéjiku la bele  hanesan ita gasta osan boot  bá ida-ne’e de’it, depois  ita halo Estádiu Olémpiku nia gasta osan de’it, ne’e mós ladún di’ak,”  Nelio Isaac Sartmento hateten.

Governante ne’e argumenta, atu harii estádiu iha Timor-Leste, hanesan responsabilidade estadu nian no Governu  nian atu haree prosesu sira. Tanba desizaun Konsellu Ministru  ne’e mai ho pakote rua maka harii Estádiu foun ho  reabilitasaun  estádiu Munisipál Dili,  ne’e pakote ida de’it, la’ós ketak-ketak.

Kona-bá konsellu Ministru, deside ona hodi atribui FFTL atu halo reabilitasaun, tuir nia katak dadaun ne’e maka sei iha faze negósiasaun,  maibé seidauk hotu. Tanba MJDAK sei halo análize,   tenke  halo diskusaun simu protestu  sira mai husi Igreja  mai husi Sosiedade sivíl.

“Karik orasida iha buat ruma maka ami sente  hatene, seidauk klaru didi’ak,  ministériu tolu ne’ebé maka relevante  sei lori fali  mai iha Konsellu Ministru hodi haree ami ninia levantamentu,  atu nune’e, Konsellu Ministru mós bele haree fila fali hanoin seluk,” nia subliña.

Nelio Isaac Sarmento hateten, daudaun ne’e la’o tuir desizaun Konsellu Ministru ne’ebé hateten katak buka took mekánizmu oinsá  hodi realiza pedidu sira ne’ebé  mai husi Federasaun Futeból Timor-Leste. Atu halo Estádiu iha Tasi-Tolu mós, MJDAK la’o hasoru buat barak, hanesan  sei selu indemnizasaun, rai nia luan no selu indemnizasaun hotu,  no halo fali reabilitasaun bá estádiu  ne’e nia kustu hanesan ka boot liu, ne’e  tenke buka fali opsaun seluk ona.

Reportajen ekipa Rafa.tl