PN Sei Buka Hatene Dezentendimentu Bá Reabilitasaun Estádiu Munisipál Dili, PM Xanana: Konsellu Ministru Aprova Tiha Ona

DILI, RAFA.tl– Parlamentu Nasionál  liuhosi Komisaun G ne’ebé trata asuntu Edukasaun, Joventude, Kultura no Sidadania, sei buka hatene no sei bolu Ministru Joventude, Desportu, Arte no Kultura (MJDAK), Nelio Isaac Sarmento, hodi husu klarifikasaun kona-bá  dezentendimentu ho Federasaun Futeból Timor-Leste (FFTL) iha konstestu reabilitasaun Estádiu Munisipál Dili no konstrusaun estádiu foun no kampu futsal indoor tuir padraun internasionál iha Tasi-tolu.

Notísia Relevante: FFTL La Kontente MJDAK La Hatudu Vontade Di’ak Deskute Reabilitasaun Estádiu Munisipál Dili

Membru Komisaun G PN, Mateus da Cruz de Carvalho, Sesta (05/09/2025), iha Parlamentu Nasionál, hateten bá jornalista sira, katak  Komisaun G-PN mós sei akompaña prosesu hotu konstrusaun estádiu foun no kampu futsal indoor ne’ebé FIFA apoiu atu harii tuir padraun internasionál iha Tasi-tolu.

Deputadu Mateus da Cruz de  Carvalho hateten proposta reabilitasaun Estádiu Munisipál Dili ho konstrusaun kampu foun futsal indoor ho padraun internasionál ne’e aprova tiha ona iha Konsellu Ministru tuir proposta Federasaun Futeból Timor-Leste (FFTL) nian. Tanba ne’e, Ministru Nelio Isaac Sarmento, tuir loos buka kumpre ho didi’ak desizaun Konsellu Ministru nian ne’e.

“Ita hatene katak tinan barak nia laran joventude parte desportu liuliu iha área futeból, ita-nia kampu ne’ebé iha la tuir padraun FIFA atu utiliza. Tanba ne’e,  ha’u hanoin importante tebes Estádiu Nasionál ida ho padraun internasionál bele fasilita jogu intenasionál iha ita-nia rai, tanba desportu ne’e agora tama iha industria no bele kontribui reseita bá Estadu,” Deputadu Mateus da Cruz de Carvalho  hateten.

Deputadu Bankada CNRT ne’e husu ba Governu liuliu Ministériu Joventude Desportu Arte no Kultura (MJDAK) ho Fedarasaun Futeból Timor-Leste (FFTL) tenke haree situsaun ida-ne’e, tanba importante loos atu Timor-Leste iha estádiu ho padraun internasionál.

“Ha’u hanoin katak konflitu interese sira ne’e remata no tau bá kotuk, haree interese nasionál, ida-ne’e maka importante tebes. Interese nasionál maka tenke tau bá oin. Labele iha interese konflitu entre  MJDAK ho FFTL hodi preziduka fali apoiu FIFa nian ba harii infraestrutura futeból nasionál,” Deputadu Mateus hateten.

Nia  afirma  sé Timor-Leste  halo estádiu padraun internasionál bele iha kapasidade kadeira to’o 30,000 no ema fiar halo jogu iha estadiu laran no fa’an tikete ida $5.00 ne’e bele hetan retornu boot bá jogu ida.

Primeiru-Ministru Kay Rala Xanana Gusmão, fó ona orietasaun para prosesu harii estádiu padraun internasionál iha Tasi-tolu ne’e bele la’o no MJDAK tenke obedese bá desizaun ne’ebé  superior Konsellu Ministru aprová ona.

Membru PN husi Bankada CNRT ne’e informa  katak MJDAK la fó autorizasaun ba FFTL atu utiliza kampu sira hanesan iha Estádiu  Munisipál Dili, tanba ho razaun kampu ne’e sei iha prosesu reabilitasaun.

“Sé kampu futeból sira iha munisipíu ne’e la autoriza tanba saida, ita bele hateten estádiu Dili iha prosesu reabilitasaun depois jogu CPLP, ne’e ita komprende laiha problema. Maibé, sé Estádiu hanesan Manatuto husu atu uza, maibé  la fó  autorizasaun ne’e tanba saida, ne’e tenke haree didi’ak, atu husik kampu sira-ne’e du’út maka moris iha laran, Governu gasta osan bá kampu sira-ne’e  para fó autorizasaun bá  federasaun bele utiliza bá atividade jogu sira,” nia hatutan.

Nia subliña, tanba Parlamentu Nasionál agora iha resesu hela, depois tama fali mai maka Komisaun G sei bolu Ministru  Joventude Desportu no Arte Kultura (MJDAK)  Nelio Isaac Sarmento depois halo konfirma situasaun ne’e ho Ministru tanba saida,”nia hateten.

Iha Kinta, 04 fulan-Setembru 2025, Primeiru-Ministru (PM), Kay Rala Xanana Gusmão, reiteira tan katak reabilitasaun Estádiu Munisipál Dili ho konstrusaun kampu futsal indoor padraun internasionál iha Tasi-tolu ne’e aprova tiha ona iha reuniaun Konsellu Ministru.

XI Governu Konstitusionál liuhusi reuniaun Konsellu Ministru iha Palásiu Governu, Kuarta 04 fulan-Juñu 2025, aprova  proposta husi Federasaun Futeból Timor-Leste (FFTL) ne’ebe atu halo reabilitasaun bá Estádiu Munisipál Dili no halo tán konstrusaun foun bá Estádiu ho kampu futsal indoor tuir padraun internasionál iha Tasi-tolu.

Mézmu nune’e, to’o ohin loron, Federasuan Futeból Timor-Leste (FFTL) seidauk bele hahú prosesu reabilitasaun Estádiu Munisipál Dili tanba Ministru Juventude, Desportu Arte no Kultura (MJDAK) seidauk tuur hamutuk ho FFTL atu halo diskusaun no atribuisaun Estádiu Munisipál Díli  ba FFTL.

 FFTL Bele Avansa Ona

Eis Sekretáriu Estadu Juventude no Desportu (SEJD), Abrão Nokosiku Saldanha, hateten projetu reabilitasaun  Estádiu Munisipál Dili,   la devia Ministériu Juvendute  Desportu, Arte no Kultura,(MJDAK) tau kanuru-tohar mós FFTL  bele avansa de’it, tanba Konsellu Ministru   deside  tiha ona.

Eis SEJD Abrão   Nokosiku Saldanha hateten, FFTL ho MJDAK presiza tau interese nasionál iha oin no presiza ko’alia bá malu ho didiak.

“Kona-bá atribuisaun Estádiu Munsipál Dili,  la devia MJDAK, maibé FFTL bele avansa de’it, tanba  prosesu ne’e la’ós foin hahú, dézde kedas  Governu  sira liubá,   liu-liu VIII Governu, falta de’it  kondisaunns, ha’u  rona dehan Konsellu Ministru  deside tiha ona falta de’it MJDAK atu halo atibuisaun bá FTTL,” Abrão Nokosiku Saldanha hateten bainhira dada-lia arredór Komite Sentrál FRETILIN (CCF),   Sesta (05/09/2025).

Nia hatutan,  sé  iha diferensa ruma entre MJDAK  Nelio Issac Fernadnes  ho Prezidente  FFTL, Nilton Telmo Gusmão do Santos, bele tau ketak  bá kotuk, hodi ko’alia bá malu,  buka menkanizmu oinsá  atu  iha intendimentu, maibé servisu ne’e tenke kontinua la’o, tanba  FIFA tau osan ne’e kleur loos tiha ona  kuaze besik ona tinan sia (9), falta de’it atu rezolve atribuisaun  rai ne’e hodi mobiliza apoiu  FIFA  nian.

Nia afirma, kooperasaun ne’e tinan barak  tiha ona,  akordu preparadu tiha ona   hein de’it atu mobliza ho nia rekizitu  maka  artribuisaun  husi Governu bá FFTL.

Nia haktuir, atribuisaun ne’e uluk halo tiha ona iha mandatu VIII Governu, Ministériu Justisa  atribui tiha ona ba Sekretáriu Estadu  Juventude no Deposrtu,  agora Ministériu Juventude  Desportu Arte no Kultura,  tanba ne’e atu muda akordu ka mantein  akordu ne’ebé maka  iha ona,  hodi bele FFTL  asina akordu ho FIFA atu kontinua projetu ne’e la’o.

Nia husu bá MJDAK ho FFTL. La bele  lori interese privadu hodi kahur fali bá interese komún  hodi sakrifika ema hotu  nia hakarak.

Reportajen Ekipa Rafa.tl