Tribunál Aplika Medida Aprezentasaun Periódika Ba Reitór UNTL no TIR Ba Dirijente Na’in-Lima

TJPID liu husi Juiz titulár Arjentino Nunes hatun despaixu ikus ho medida koasaun Aprezentasaun Periódika (AP) no medida Termu Indentidade Rezidénsia (TIR) ba Reitór UNTL ho insiál JM no dirijente na'in-lima seluk tan, Sábadu (17/01/2026). Imajen/Rafa.tl

DILI, RAFA.tl–  Tribunál Judisiál Primera Instánsia Díli (TJPID), liu husi despaixu ikus ba prosesu primeiru interogatóriu, Sábadu (17/01/2026), deside aplika medida aprezentasaun periódika (AP) ba Reitór Universidade Nasionál Timor-Lorosa’e (UNTL) ho inisiál JM no Termu Indentidade Rezidénsia (TIR) ba  kargu xefia na’in-lima seluk.

Notísia Relevante: MP Solisita Ba Tribunál Aplika Medida AP, Proibisaun Auzénsia no TIR Ba Reitór UNTL ho Kargu Xefia Na’in-Lima

Iha prosesu kazu abuzu poder no pekulatu ba uzu ne’ebé akontese iha tinan 2024 ne’e, Tribunál notifika arguidu na’in-neen  iha Universidade Nasionál Timor-Lorosa’e (UNTL),  maka hanesan,  Reitór UNTL ho inisiál JM, arguidu FQdC, arguidu  TS, arguidu MB,  arguida JMM no LSdA.

Juiz Turnu Arjentino Nunes liu husi despaixu ikus deside aplika medida Aprezentasaun Periódika (AP) no medida Termu Indentidade Rezidénsia (TIR) ba Reitór UNTL  ho inisiál JM no medida koasaun Termu Indentidade Rezidénsia (TIR) ba arguidu na’in-lima seluk,  ho inisiál mak hanesan FQdC, TS, MB, JMM no LSdA.

Hafoin despaixu husi Tribunál, Advogadu privadu Arlindo Sanches informa katak, nia asistidu hanesan Dekanu hetan medida TIR.

“Ha’u nia asistidu hetan medida TIR, tanba ne’e ha’u mós aseita ho medida ne’e,” Arlindo Sanches informa ba Jornalista sira iha TJPID.

Advogadu privadu Napoleão de Olivera Carvalho deklara, nia fó asistensia ba asistidu na’in rua, maibé hetan hotu medida TIR mézmu husi sira-na’in-rua ne’e, ida halao hela tratamentu (baixa) iha Ospitál Nasionál Guido Valadares (HNGV).

“Asistidu nain rua ne’ebé ha’u fo asistensia ba, ida Dekanu no ida foin lalais baixa hela iha ospitál,”  Napoleão de Olivera Carvalho haktuir.

Defensór Públiku, Anzelmo Akara deklara katak, nia asistidu mós hetan medida TIR, tanba ne’e nia konkorda ho despaixu Tribunál nian.

Iha alegasaun ba prosesu ne’e, Ministériu Públiku (MP) ne’ebé reprezenta husi Prokuradór Matias Soares, solisita ba  Tribunál atu aplika medida proibisaun ba auzénsia no medida aprezentasaun períodika  ba arguidu na’in-tolu, hanesan, Reitór UNTL ho inisiál JM no Dekanu na’in-rua.

Ba arguidu na’in-tolu seluk, Ministériu Públiku husu Tribunál atu aplika medida aprezentasaun períodika (AP) no medida Termu Indentidade Rezidénsia (TIR).

Fó hanoin fali katak, Polisia Nasionál Timor-Leste (PNTL), liu husi Diresaun Servisu Investigasaun Kriminál Nasionál ezekuta mandadu Tribunál Judisiál Primeira Instánsia Díli (TJPID) ho NUC 086/25-PNSIK hodi halo buska, apreensaun no detensaun ba Reitór UNTL ho inisiál JM ho nia dirijente ka kargu xefia na’in-lima seluk tan.

Reportajen ekipa Rafa.tl