Timor Telecom iha Kompromisu Finansia Atividade FFTL

Diretora Ezekutiva Timor Telecom, Rita Sampaio Nunes ho Prezidente FFTL Nilton Telmo Gusmão dos Santos, asina akordu kooperasaun iha edífisiu FFTL, Tersa (05/08/2025). Imajen/RAFA.tl

DILI, RAFA.tl—Operadór Telekomunikasaun Timor Telecom (TT) iha kompromisu forte  apóiu dezenvolvimentu Futeból iha Timor-Leste hodi apóiu finanseiru ba atividade sira ne’ebé Federasaun Futeból Timor-Leste (FFTL) sei realiza  iha futuru.

Kompromisiu  Timor Telecom nian ne’e hatudu liuhosi asina nota enrtendimentu ka memorandu kooperasaun entre Diretora Ezekutiva Timor Telecom, Rita Sampaio Nunes ho Prezidente FFTL Nilton Telmo Gusmão dos Santos, Tersa (05/08/2025), iha edifísiu FFTL, Dili.

Diretora Ezekutiva Timor Telecom, Rita Sampaio Nunes hateten, Timor Telecom sei apóiu finanseiru ba atividade sira FFTL nian no apoiu seluk hanesan liña internet iha eskritoriu sira federasaun nian, inklui instalasaun wifi iha fatin sira ne’ebé federasaun realiza sira-nia atividade.

“Kona-bá montante finanseiru laiha serteza, tanba depende ba atividade ne’ebé FFTL sei aprezenta ba Timor Telecom,” Rita Sampaio Nunes klarifika.

Nia hatutan, kompromisiu Timor Telecom nian atu apoiu FFTL ne’e ba tinan ida, no bele iha posibilidade ba halo estensaun bazeia ba akordu sira ne’ebé iha no kooperasaun sira ne’ebé sei mai.

Prezidente FFTL, Nilton Telmo Gusmão dos Santos,  esplika kooperasaun ne’e importante tebes ba ema hotu atu transforma futeból sai orgullu nasionál.

Nilton Telmo Gusmão dos Santos hateten kooperasaun ne’e importante tebes ba FFTL hanesan ema hotu hatene, objetivu boot liuhosi estrutura Federasaun FFTL mak dezenvolve futeból sai orgullu nasional, nune’e presiza halo atividade barak liu, la’ós deit iha sidade, maibé halo mós iha munisípiu sira, tanba ne’e mak FFTL presiza rekursu finanseira lubuk ida ne’ebe atu uza ba atividade sira ne’e.

“Ami aprezenta ami nia proposta ba Timor Telecom no CEO Timor Telecom mai to’o iha FFTL hodi asina ita nia akordu ida ne’e para depois iha tinan ida ita bele haree ita nia programa sira ne’e liu husi apoiu finanseira ne’ebe Timor Telecom sei fó,” Nilton dos Santos esplika.

Prezidente FFTL ne’e hatutan Timor Telecom iha hanoin di’ak hodi hakarak fó apoiu FFTL no nu’udár prezidente ba FFTL  agradese tebes ba apoiu Timor Telecom nian tanba FFTL mós iha limitasaun oioin, tanba ida ne’e mak  presiza  ema hotu nia apoiu, no lolo-liman barak liu, nune’e  bele ajuda lori futeból ne’e di’ak liután ba oin.

“Ohin, Timor Telecom hatudu ba ita hotu, liuliu ba ema hotu hadomi futeból katak, ita la mesak maibé ita mós iha kariñu espesiál ida husi Timor Telecom ba ita-nia atividade futeból iha ita nia rai-laran, tamba ne’e nu’udár prezidente FFTL agradese tebes ba apoiu Timor Telecom nian ba ita-nia atividades ida-ne’e,” Nilton Telmo Gusmão dos Santos subliñ .

Timor Telecom no FFTL sei kontínua servisu sira ne’e ba futuru, ho hanoin ida atu hamutuk dezenvolve futeból iha Timor-Leste sai orgullu nasionál.

Reportajen ekipa RAFA