SEKOMS ho Konsellu Imprensa Elemina Artigu Responsabilidade Penál husi Proposta Revizaun Lei KomSoS

Jornalista sira halo entrevista ho SEKOMS Expedito Dias Ximenes, Kinta (14/08/2025). Imajen/Rafa.tl

DILI, RAFA.tl-Sekretáriu Estadu Komunikasaun Sosiál (SEKOMS) ho Konsellu Imprensa (CI, sigla portugés) elemina ona artigu 38 B kona-ba Responsabilidade Penal  iha ezbosu proposta revizaun lei komunikasaun sosiál (KomSoS).

Sekretáriu Estadu Komunikasaun Sosiál (SEKOMSO), Expedito  Dias Ximenes, klarifika katak enkontru ho Konsellu Imprensa ne’ebé nia  rasik mak lidera to’o ihja konkordansia mútua entre parte rua hodi elimina  tiha artigu 38 B kona-ba Responsabilidade Penal ne’ebé SEKOMS konsta iha ezbosu proposta revizaun Lei KomSoS.

“Tuir loloos esbosu  lei ne’e, dokumentu ofisiál Governu nian, ne’ebé la bele sai bá li’ur, maibé komu balun fó sai tiha ona ba li’ur, iha tiha ona diskusaun bá públiku, provoka diskusaun ne’e mós di’ak para bele fó mós  pareser públiku mai iha Governu,” Expedito  Dias Ximenes informa ba jornalista sira iha Palásiu Governu,  kinta (14/08/2025).

Governante ne’e haktuir, pareser sira ne’e hanesan halo espekulasaun oin-oin, ema balun seidauk lee lei vijente ka lei KomSoS ne’ebé vigora nune’e nia konsidera komentáriu públiku fora kontestu ba esbosu revizaun Lei KomSoS ne’ebé SEKOMS rasik prepara.

Nia afirma, durante diskusaun SEKOMS ho  CI  konkorda malu katak iha kontestu Timor-Leste nian, média mak pilar  demokrásia, média mak órgaun ne’ebé importante  bá iha prosesu konstrusaun estadu no nasaun,   maibé média tenke iha regulamentasaun forte, atu bele proteze asegura  iha sira nia servisu lorlorn nian.

Expedito Dias Ximenes fundamenta katak revizaun ka  aditamentu Lei KomSoS ne’e objetivu atu proteze no  asegura  servisu órgaun komunikasaun sosiál nian  tanba ne’e revizaun ida-ne’e  laiha intensaun atu hamate liberdade imprensa.

Sekretariu estadu afirma eazaun elimina artigu 38 B ne’e tanba tauk públiku nia espekulasaun, bele hamosu no difikulta prosesu Jornalista nia atividade iha terenu, nune’e nafatin  kaer lei vijente.

Governu ho CI korkorda ona hodi  elimina artigu 38 B, maibé   mós  sei rona asosiasaun jornslista sira, mídia na’in sira,  no sosiedade sivíl sira, maka foin bele lori ezbosu ida bá Konsellu Ministru hodi  hetan apresiasaun.

Iha  sorin seluk, Prezidente  Konsellu Imprensa Timor-Leste, Cezar Moniz Mali hateten, SEKOMS ho CI intende malu di’ak loos,  maibe iha artigu ida ne’ebé mak sai tiha  polemika iha públiku, husi sosiedade sivíl no komunidade média rasik  ne’ebé mak fó reasaun maka’as tebes.

Konsellu Imprensa  husu esplikasaun bá SEKOMS katak intensaun saida husi artigu 38 B ne’ebé iha no esplikasaun ne’ebé  SEKOMS  halo beibeik ona iha média, no mós karik iha diskusaun  ruma sekretáriu Estadu hateten katak, laiha intensaun atu krimanaliza produtu jornálista, maibé iha intensaun  atu proteze mídia sira.

“Ami husu esplikasaun, no mantein de’it lei atual bele ka lae, nune’e afinál SEKOMS ho Konsellu Imprensa, iha hanoin hanesan hela, mai atu propoin katak karik mosu ona polemika, ita mantein ho lei ezistente no ita hasai tiha artigu 38 B, laiha problema,” Cesar Moniz Mali hateten.

Prezidente CI ne’e hatutan, razaun retira esbosu lei 38 B ne’e tanba lei ezistente koalia hanesan, laiha intensaun atu krimanaliza Jornslista sira maibé esbosu lei KomSoS artigu 38 B ne’e hamosu tiha polemika sira durante ne’e, maibé importante mak  iha konsensia  di’ak hodi retira ka elimina tiha  ona artigu 38 B ne’e.

Reportajen ekipa Rafa.tl