MP Solisita Ba Tribunál Aplika Medida AP, Proibisaun Auzénsia no TIR Ba Reitór UNTL ho Kargu Xefia Na’in-Lima

Polísia akompaña arguidu reitór UNTL ho kargu xefia na'in-lima seluk hodi lori ba julgamentu primeira interogatóriu iha TJPID, Sesta (16/01/2026). Imajen/Rafa.tl

DILI, RAFA.tl- Ministériu Públiku (MP) iha alegasaun ba prosesu julgamentu primeiru interogatóriu ba loron daruak nian, Sesta (16/01/2026),  iha alegasaun husu Tribunál atu aplika medida aprezentasaun periódika (AP), proibisaun ba auzénsia no termu identidade rezidénsia (TIR) ba arguidu Reitór  Universidade Nasionál Timor-Lorosa’e (UNTL) ho inisiál JM inklui dirijente na’in-haat seluk tan.

Notísia Relevante: PM Xanana Lamenta Tribunál Hasai Mandadu Buska, Apreensaun no Detensaun Ba Reitór UNTL ho Nia Dirijente Sira

Hafoin Juiz titulár Arjentino Nunes halo tiha indentifikasaun ba arguidu sira, ikus mai deside hodi tama ba iha faze alegasaun husi Prokuradór no Defeza arguidu sira nian.

Iha alegasaun ba prosesu ne’e,  Ministériu Públiku ne’ebé reprezenta husi Prokuradór Matias Soares, deklara no  husu Tribunál atu aplika medida proibisaun ba auzénsia no aprezentasaun periódika  ba arguidu na’in tolu hanesan, Reitór UNTL no Dekanu na’in-rua. Enkuantu ba arguidu na’in-tolu seluk, Ministériu Públiku husu Tribunál atu aplika medida aprezentasaun periódika (AP) no medida termu identidade rezidénsia (TIR).

Parte Advogadu privadu no Defensór Públiku  ne’ebé fó asisténsia legal ba arguidu sira, husu Tribunál atu aplika medida koasaun termu identidade rezidénsia (TIR) ba arguidu sira.

Rona tiha alegasaun, Tribunál adia julgamentu ba  Sabádu (17/01/2026), hodi rona despaixu husi Tribunál, kona-ba medida saida maka Tribunál deside hodi aplika ba iha arguidu sira.

Hafoin alegasaun remata, Tribunál liberta kedan arguidu sira husi sela detensaun, tanba prazu detensaun liu ona.

Prosesu primeiru interogatóriu ne’e taka ba iha públiku, maibé husi parte Ministériu Públiku (MP), promove krime haat ba iha arguidu sira, maka hanesan krime administrasaun danoza, krime pekulatu ba uzu, krime falsifikasaun dokumentu, no krime abuzu poder.

Prosesu ne’e, prezide husi Juiz titular Arjentino Nunes, Ministeriu Públiku reprezenta husi Prokuradór Matias Soares, no arguidu na’in-lima hetan asistensia legal husi Advogadu Privadu no Defensor Públiku.

Fó hanoin fali, katak Polisia Nasional Timor-Leste (PNTL), liu-husi Diresaun Servisu Investigasaun Kriminal Nasionál ezekuta mandadu Tribunál Judisiál Primeira Instánsia Díli (TJPID) ho NUC 086/25-PNSIK hodi halo buska, apreensaun no detensaun ba Reitór UNTL ho inisiál JM ho dirijente na’in-lima seluk tan.

Diresaun Servisu Investigasaun Kriminál Nasionál ezekuta mandadu Judisiál hodi halo buska, apreensaun no detensaun ne’e  relasiona ho violasaun balu ne’ebé akontese iha UNTL iha  tinan 2024.

Reportajen ekipa Rafa.tl