Karketu Dili F.C Sofre Derrota 1-2 iha Jogu Ikus Kontra Coração F.C

Kampiaun Primeira Divizaun Liga Futeból Timor-Leste (LFTL), Karketu Dili F.C, sofre derrota 2-1 kontra adversáriu Coração F. C iha jogu ikus Liga Timorense bá époka 2025 iha Estádiu Munisipál Dili, Sábadu (23/08/2025). Imajen/Rafa.tl

DILI, RAFA.tl– Kampiaun Primeira Divizaun Liga Futeból Timor-Leste (LFTL), Karketu Dili F.C, sofre derrota 2-1 kontra adversáriu Coração F. C iha jogu ikus Liga Timorense bá époka 2025 iha Estádiu Munisipál Dili, Sábadu (23/08/2025).

Notísia Relevante: Órgaun Liga Kongratula Karketu Dili F.C Kampiaun Liga Timorense Époka 2025

Ekipa Karketu Dili F.C ne’ebé hetan ona serteza ba títulu kampiaun Liga Timorense époka 2025 iha jornada da-ualu mantein nia ritmu jogu iha jornada ikus kontra Coração F.C maibé iha plantel ka lista jogadór Karketu Dili F.C fó liu oportunidade ba jogadór suplente sira hodi tama iha line-up, enkuantu jogadór prinsipál liu-liu kapitaun Emanuel Adade ho sira seluk iha deit bench.

Iha jogu primeira parte hahú ekipa Coração F.C ne’ebé hakarak haksoit sai husi zona degradasaun, aproveita kedas oportunidade ne’ebé iha hodi halo jogu ida atakante no agresivu, aproveita rotasaun bá jogadór ne’ebé Karketu Dili F.C iha.

Treinadór husi ekipa rua, mantein pozisaun hamrik iha kampu ninin, hodi fó orientasaun bá sira-nia jogadór no husu jogadór sira konsentra ho jogu hodi implementa tátika ne’ebé aprende durante preparasaun bá jogu ne’e.

Iha jogu ne’e  Coração F.C iha liu ambisaun atu domina jogu hodi hadau vitória, maske nune’e, Karketu Dili F.C sei sólidu iha liña mediu no defeza, hodi antesipa atake sira ne’ebé Coração F.C halo.

Jogadór ekipa rua iha ánimu maka’ás loos, adeptu sira ne’ebé asiste jogu ekipa rua ne’e kontínua fó apoiu bá idak-idak nia ekipa, Karketu Dili FC sira-nia adeptu sira ne’ebé hatene katak sira mak kampiaun hakilar ho lia maka’ás liután katak Kampiaun no Kampiaun, ekipa Matak Malirin Kampiaun.

Tama bá minutu 38, Coração F.C konsege loke dalan bá vitória ho golu dahuluk ne’ebé produz husi Lexy Atok, ho golu ne’e halo Coração F.C iha liután espíritu atu rekolla vitória bá jogu ne’e.

Ho golu ne’e halo Coração F.C hasa’e liután nia ritmu no intesidade jogu hodi halo presaun bá Karketu Dili F.C, maibé too primeira-parte termina Coração F.C mantein ukun ho score 1-0.

Tama bá segunda parte, ekipa rua mantein ho jogu ne’ebé iha, maibé Karketu Dili F.C hahú halo mudansa bá nia jogu no tátika iha liña klaran hodi hadi’a ritmu no buka oportunidade bá hatama golu hodi halo empata.

Tama bá minutu 68, ekipa Karketu Dili F.C halo empata bá jogu hodi muda score bá 1-1 hafoin jogadór Januario Fonseca fura rede Coração F.C. ho golu ne’e halo Coração F.C la hakmatek no hetan presaun barak liután tanba atu sai husi zona degradaun Coração F.C tenke rekolla vitória iha jogu ikus.

Treinador Coração F.C, Gaspar Amaral hahú halo mudansa ba tátika no halo mós subtituisaun bá liña jogadór hodi hadia hikas ritmu jogu hodi halo kontra atake bá Karketu Díli F.C.

Ho estratejia no tátika ne’ebé iha, Coração F.C konsege marka golu vitória iha extra time, minutu 90+2 liuhosi jogadór Jeka M. Monteiro.

Ho golu ne’e, halo ekipa Coração F.C termina jogu jornada ikus ho vitória 2-1 no Karketu Dili F.C obrigadu tenke sofre derrota iha jogu ikus, maske hetan ona títulu kampiaun iha jornada da-ualu Primiera Divizaun Liga Timorense.

Reportajen ekipa Rafa.tl