Foin-sa’e sira Banati Tuir Espíritu no Sakrifísiu FALINTIL Ne’ebé Halo ho Domin Bá Timor-Leste

Prezidente Partidu FRETILIN, Francisco Guterres "Lú-Olo". Imajen/Rafa.tl

DILI, RAFA.tl–Eis Prezidente Repúblika atuál Prezidente Partidu Frente Revolusionáriu Timor-Leste Independente (FRETILIN), Francisco Guterres “Lú-Olo”, husu foin-sa’e sira  banati tuir espíritu no sakrifísiu ne’ebé FALINTIL halo ho domin bá Timor-Leste.

Notísia Relevante: Prezidente Repúblika Husu Povu Tomak Fó Omenajen Bá FALINTIL

Prezidente Partidu FRETILIN, Francisco Guterres “Lú-Olo” hato’o nia mensajen ne’e, relasiona ho selebrasaun tinan-50, loron FALINTIL ne’ebé halo iha loron 20 fulan-Agostu, tinan ne’e.

Francisco Guterres Lú-Olo  ba jornalista sira,  foin lalais ne’e, hato’o hakuak boot no saudasoens bá FALINTIL, rekoñesemintu boot no kle’an bá sira-nia misaun nobre ne’e.

Nia afirma parabéns bá FALINTIL-Forsa Defeza Timor-Leste (F-FDTL) no bá kompañeiru luta iha ai-laran, bá veteranu sira ne’ebe sei ativu hela iha vida militár ho imi nia dedikasaun no sakrifísiu, mak ohin loron Timor-Leste hamriik hanesan nasaun ida independente.

“Bá loron 20 fulan-Agustu ne’ebé komemora dadaun, ha’u hakarak atu husik hela parabéns bá FALINTIL-Forsa Defeza Timor-Leste (F-FDTL), partikularmente ha’u nia kompañeiru da luta iha ai-laran, veteranu sira ne’ebé mak oras ne’e dau-dauk sei ativu hela iha F-FDTL, balun dezmobilizadu ona, maibé iha biban no oportunidade ida ne’e hato’o ha’u nia hakuak boot no saudasaun bá sira no husik hela ha’u nia rekoñesimentu boot bá sira-nia misaun nobre ida ne’e” Francisco Guterres Lú-Olo hateten.

Eis Prezidente Repúblika ne’e fundamenta katak FALINTIL hanesan Forsa bá Armada Libertasaun Nasionál, ne’ebe hori uluk kedas nu’udár forsa ka liman kroat povu maubere nian, atu luta hasoru saida deit mak akontese no defende kauza bá independensia ne’ebé mak FRETILIN proklama no FALINTIL kumpre duni nia misaun boot ne’e ho dignu tebes, no Timor-Leste hetan duni nia independénsia.

Nia husu ba bá foin-sa’e sira, nafatin banati no kaer bá espiritu sakrifísiu ne’ebé luta nain sira halo. Nune’e,  iha tempu agora hakarak joven sira-nia matenek, atu hasoru situasaun sira hotu no sempre halo kritika nafatin bá situasaun sira ne’ebe agora akontese hela.

“Espiritu sakrifísiu, buat ne’ebe ami halo ne’e halo dala ida tiha ona atu oferese aan ba mate, ida ne’e ami halo tiha ona, ne’ebé la presiza ona iha tempu agora atu repete fila fali, ami so hakarak de’it mak matenek atu bele infrenta situasaun sira hotu. Agora dau-dauk atu bele ho vizaun ida, sempre kritiku nafatin bá situasaun sira ne’ebe oras ne’e dau-daun akontese iha ita nia rai laran, atu nune’e, foin-sa’e sira mós hamrik metin ho sira ain,” Lú-Olo tenik.

Lú-Olo subliña liután bá foin-sa’e sira, tenke hamrik iha ain fatin hodi kritika buat ne’ebé sala halo loos, kritika ho konstrutivu hodi hadia rai ne’e sai diak liután. Tanba futuru nasaun nian, iha foin-sa’e nia liman, estuda maka’ás no aprende barak tanba nasaun sei presiza foin-sa’e sira.

Prezidente partidu FRETILIN, Francisco Guterres “Lú-Olo, husu ba membru F-FDTL no  ba sira ne’ebé sei dezmobilizadu iha loron 20 fulan-Agostu, bá ofisiál no soldadu sira, FRETILIN disponivel atu simu fila fali sira, karik sira hakarak atu fila-fali mai hamutuk ho FRETILIN, hanesan ema sivíl no vida polítika.

Reportajen ekipa Rafa.tl