Estudante Tenke Aproveita Oportunidade Estuda Labele Sai Atan Bá Telemovel

Estudante ida kaer hela telemovel iha liman hodi haree mensajen sira iha média sosiál Facebook no WhatsApp. Foto/Rafa.tl

DILI, RAFA.tl—Akádemiku  husi Departamenu Komunikasaun Sosiál, Universidade Orientál Timor-Lorosa’e (UNITAL) fó hanoin ba estudante sira atu la bele sai atan ba telemovel ka smartphone, maibé aproveita oportunidade ho apoiu teknolojia nian hodi estuda no aprende barak liután.

Notísia Relevante: Telemovel Hanesan Veneno Ne’ebé Hamate Estudante Sira-Nia Vontade Estuda

Dosente komunikasaun sosiál UNITAL, Joanico do Rosário, ba Rafa.tl, Kinta (07/08/2025) iha nia servisu fatin, hateten estudante sira labele sai atan ba telemovel, labele husik telemovel regulariza estudante sira-nia aan, maibé tenke hatene uza teknolojia ba apende buat ruma hodi halo inovasaun iha sosiedade.

Nia afirma smarthphone ka telemovel ne’e hanesan meiu ida ne’ebé atu fasilita ema iha liña komunikasaun, maibé nia impaktu ne’e maka dalaruma utulizadór sira uza la ho responsabilidade hodi fó impaktu negativu ba ema nia moris.

“Telemovel ne’e hanesan meiu ida ne’ebé maka atu fasilita ita, oinsá ita atu halo komunikasaun lalais ho ita-nia família, kolega no ema hotu-hotu. Bele fasilita mós halo servisu ka traballu sira, no kauza ne’e depende ba ema ida utiliza ne’e, tanba estudante barak utiliza ba buat ida ne’ebé la fó benefisiu, entaun ita tenke uza ho di’ak hodi labele sai atan ba teknolojia,” Joanico do Rosário hateten.

Dosente ne’e rekomenda ba Governu presiza tau atensaun ba iha asuntu ida ne’e, tanba iha éra tdijitalizasaun no avansu teknolojia buat hotu livre, ema hotu-hotu iha asesibilidade ba sítiu sira hotu, iha di’ak  no iha mós ladi’ak, tanba ne’e tenke iha lei atu regulariza no fó asesibilidade ba públiku, liu-liu ba estudante sira.

Iha nasaun seluk, ne’ebé teknoljia avansadu, publikasaun sira, asesu ba informasaun sira, liu husi prosesu ida ne’ebé maka rigor la’ós hotu-hotu livre asesu ikus mai ema nia kakutak baralla.

Manorin na’in ne’e mós husu ba inan no aman sira iha uma atu sai ajente kontroladór atu kontrola oan sira utiliza telemovel ho saudavél no tuir dalan ne’ebe pozitivu, tanba inan-aman maka pasa tempu barak ho oan sira kompara ho fatin apredijazen sira.

“Ita la’ós fó sala ba inan no aman sira, maibe inan no aman nia supervizaun bao an sira importante tanba iha eskola, dosente sira bele hanorin, no bele akompaña sira, maibe tempu barak liu iha uma, no inan-aman sira tenke kontrola ho másimu,” nia hateten.

Joanico do Rosário subliña liután katak, ho situasaun ohin loron estudante sira tenke matenek atu uza telemovel ka smarthphone, tanba dalabarak impaktu husi telemovel halo sira haluha atu kumpre sira-nia dever hanesan estudante.

Reportajen ekipa Rafa