Jogadór Selesaun Futsal Timor-Leste Lakon iha Fíziku

Jogu ne'ebé rezulta Timo-Leste derota kontra Vietname ho skor 1-7 iha ASEAN Futsal Championship 2026. Imajen/Espesiál

Díli, 12 Abríl 2026 (RAFA.tl)- Asistente Treinadór  Selesaun Nasionál Futsal Timor-Leste,  Nelcen Escurial, konsidera derota ne’ebé ekipa sofre iha jogu ASEAN Futsal Championship 2026 tanba jogadór sira lakon iha fíziku ne’ebé impaktu mós husi preparasaun ne’ebé la másimu.

Ekipa Selesaun Timor-Leste hamutuk iha Grupu A ho nasaun sira hanesan Tailándia, Vietnam no mós Myanmar . Husi jogu tolu ne’ebé Timor-Leste enfrenta, ekipa selesaun Nasionál Futsal sofre derota rua no manan iha jogu ikus kontra ekipa Myanmar.

Hafoin termina jogu, ekipa selesaun Nasionál Futsal fila hikas mai Timor-Leste iha Sábadu (11/04/2026). Asistente treinadór Nelcen Escurial ba jornalista sira iha Salaun FFTL hateten, husi avaliasaun ne’ebé iha hatudu katak ekipa selesaun nasionál Futsal Timor-Leste maske la pasa ba faze tuir mai, maibe ekipa iha ona mudansa ba jogu tanba konsege halakon Myanmar, no nia parte haré katak presiza hadia diak liután atu nune’e bele prepara fali ba jogu sira ne’ebé sei tuir mai.

Nia hatutan kona-bá Tailándia hotu-hotu hatene katak ida-ne’e liurai iha ASEAN, uluk hanesan jogadór mós sira konsege derota ho skore ne’ebé mak boot tebes, maibé agora ne’e konsege hadia neneik  to’o 4 a 1,  ida-ne’e rezultadu ne’ebé di’ak, no tinan oin tenke hadi’a di’ak liután.

“Ita derota ho skore boot oituan 1 á 7. Preparasaun  fulan ida-ne’e, liuliu ba kondisaun fizika  seidauk bele, jogu tuituir malu ne’e ita seidauk bele, liuliu hasoru ekipa ne’ebé hanesan Tailándia, Vietnam no sleuk tan,” Nelcen Escurial hateten.

Iha fatin hanesan, kapitaun selesaun Nasionál Futsal Timor-Leste, Eufragio Amaral Soares, husu Federasaun atu kria kompetisaun regular ba jogu futsal, atu nune’e, bele eleva kualidade no espiritu jogadór hodi kompete iha nivel internasional sira.

“Ami hanesan joga bebeik ona, ha’u hanoin diferensia boot tebes entre ita  ba joga iha internasionál, tanba ita haré fasilidade deit ita menus husi sira, maibé ida-ne’e la signifika katak hamonu jogadór nia espíritu luta, maibé ida-ne’e  hasa’e jogadór nia espiritu hodi bele kompete iha jogu internasional,” Eufragio Amaral Soares haktuir.

Nia dehan tenik, “preparasaun liu-liu ba ita nia kampionatu iha rai laran, ida-ne’e tenke lao regular atu nune’e it abele kompete iha rai-li’ur di’ak liután, tanba dalaruma ita paradu kleur, ita foin hahú ba treinu fali, ha’u hanoin ida-ne’e difisil”. Eufragio Amaral Soares hateten.

Iha fatin hanesan, Diretór servisu Selesaun Nasionál Federasaun Futebol Timor-Leste, João Maneco konsidera ekipa iha ona mudansa tanba hetan vitória ida kontra Myanma,r nune’e Federasaun buka mekanizmu hodi mantein mudansa ne’ebé iha.

“Konkista ne’ebé mak ita nia selesaun futsal hetan iha jogu loron hirak liubá, ida ne’e mak ita baibain  temi mudansa, mudansa ne’e mak nia faze por faze, tanba ne’e mak depois sira  derota tiha jogu rua, no jogu ultimu konsege manan ekipa ne’ebé mak zigante iha ASEAN (Myanmar), ida-ne’e hanesan orgullu  boot ida  ba ita,” João Maneco afirma.

Nia hatutan Federasaun  ninia obrigasaun mak atu haré fali apoiu  seda mak tenke halo hodi mantein mudansa  ne’e hodi nune’e grafiku ne’e sae nafatin.

Diretór FFTL ne’e subliña iha buat rua mak sei haré, mak kompetisaun no mós fasilidade, kompetisaun ne’e mak Federasaun deside tebes hodi apoia liga futsal ba tinan ida-ne’e, tanba ne’e parte husi ajenda federasaun nia rasik.

Kon-bá fasilidade, João Maneco  informa husi FIFA no  AFC  preve ona orsamentu balu atu futsal  iha kampu ne’ebé mak refleta padraun internasionál.

Jornalista: Marito da Costa/Editór: Vito Salvadór